Démocratie participative / Demucrazia participativa, Lingua corsa, Environnement / Ambiente, Mairie / Merria, Vivre ensemble / Campà Inseme

Un giardinu participativu per a Citatella : Inaugurazione prevista u mercuri u 14 di settembre à parte da 7ore di sera

Messu in linea u

À truvà ci u mercuri u 14 di settembre à parte da 7ore di sera, u Merre di Bastia, Pierre Savelli, a Municipalità è u cunsigliu di quartieru Campà Insu s'adunisceranu per inaugurà unu di i primi giardini participativi di a cità. Appuntamentu in u giardinettu di a Ripa in Terra Vechja.

Da New York à Bastia

In l'anni 70, a cità di New York hè culpita da una crisa finanziaria. A cità và di male è parechji sò i casamenti à esse diruchjati per fà piazza à pianure. Hè inde issu cuntestu chì Liz Christie, un'artista di Manathan decida di virdisce e sodule cù "bombe" di granelle da fà sbuccià Fiori. U fattu si stà chì l'abitanti s'impatruniscenu di issi spazii chì diventanu prestu lochi di cunvivialità, sulidarità è di cultura. In Francia ci vulerà à aspettà u 1997 da vede nasce u primu giardinu scumpartutu in a cità di Lille, Pariggi li s'incalca in u 2002.

Inghjennà lea suciale è sviluppu à longu andà

I giardini participativi battenu à prò di i baratti è leganu l'abitanti di un listessu quartieru qualsiasi l'età, a cultura è u mezu suciale. Ci hè mezu à prupone varie attività in grembiu à issi giardini : ripasti è festa di quartieru, corsi di giardinaggiu, cuncerti, ecc. Fatta a fine issi giardini s'imponenu da lochi di vita induve ellu s'impara à cunnosce u so cunvicinu.

Ponu permette di dà frutti è urtaglie è di manghjà ropa fresca è di stagione. Battenu à favore di u priservamentu di l'ecosistema citatinu favurizendu a biodiversità, rimette a natura in core à u spaziu publicu , fà per l'embiu scumpartendu u so mulizzu.

Un giardinu participativu in Citatè

Dopu à l'orti di u cullegiu di San Ghjisè, di a scola Venturi è quellu di l'associu CPIE Bastia - U Marinu in Montesoru, a cità, risponde à a dumanda di u cunsigliu di quartieru di a citatella Campà Insu da rimette in sesta un giardinettu in a Ripa.

U riassestu di issu locu publicu hè u fruttu di un travagliu cullettivu appittatu da u serviziu di a demucrazia participativa, i servizii tecnichi, hè da mintuvà l'impegnu di u cunsigliu di quartieru Campà Insu è di l'usteriaghju di Le Petit Vincent.

Issu giardinu hè singulare postu ch'ellu face cumbasgià attività ecunomica cù u risturante "Le Petit Vincent" è spaziu verde incù a brama di benistà è di adurnamentu . Da pocu, l'abitanti s'aduniscenu è si cuncertanu da sceglie e so piante.

L'inaugurazione hè aperta à tutti, l'avete capita site invitati u 14 di settembre à parte da 7ore di sera !

Altri giardini per i quartieri bastiacci

U prugettu di giardinu participativu si pò tramutà inde l'inseme di i quartieri di a cità secondu a dispunibilità di i terreni è di a brama è l'impegnu di l'abitanti.