Patrimoniu

Hè stata creata a Direzzione di u Patrimoniu in u 1997 da ch’ellu fussi cunsideratu u patrimoniu cum’è una primura culturale maiò. Gestisce è mantene l’edifizii religiosi, civili è militari ch’ella pussede, è a mubiglia chì hè cunservata.

Per via di quessa, assicureghja u muntame è a messa in opera di prugetti di valurisazione, di ristoru, di animazione di i so averi patrimuniali, cullaburendu incù l’altre direzzione di a Cità, i servizii di u Statu è l’altre cullettività di Corsica è di Francia cuntinentale.

Si dà cum’è obbiettivu l’inventariu di u patrimoniu di Bastia, ducumentendu lu. Sò state publicate e munugrafie di una maiò parte di l’edifizii religiosi di a cità, è l’inventarii di e pitture è di l’ogetti di ghjuvelleria chì appartenenu à e cullezzione municipale.

Hè u puntellu, cù u Museu di arte è di storia è a Bibliuteca Prelà, di un polu di animazione ingiru à a nuzione di « patrimoniu culturale », in leia cù l’altri attrazzi culturali di a Cità è di a regione.

Hè dinù, l’interlocutore principale per i sfarenti publichi (sculari, universitarii, turistichi, assuciativi, ecc.).

A vuluntà, pulitica, di pensà u patrimoniu cum’è orientazione di primura per u sviluppu lucale, i mezi scentifichi è umani messi in opera, a qualità di u travagliu eseguitu, anu permessu à Bastia di ottene u labellu Cità di Arte di Storia.

 

Dans cette rubrique

  • Casamenti

    Assicureghja a Cità u mantenimentu è a valurisazione di l’edifizii patrimuniali soi, frà i quali tenenu u primu postu e chjese situate nant’à u so territoriu, chì sò da cunsiderà. Vensenu innalzate prima di a lege di spicchera trà a Chjesa è u Statu di u 1905.

  • Cullezzione

    Hè incaricata, a Direzzione di u Patrimoniu, di gestisce è di mantene l’inseme di e cullezzione storiche è artistiche di a Cità di Bastia, fora di quelle chì dipendenu di u museu municipale. E missione ch’ella cunduce sò : l’inventariu, a cunservazione è u ristoru, a valurisazione è a sparghjera di l’inseme di u patrimoniu mubigliare è immubiliare ch’elli tenenu l’edifizii civili è religiosi appartenendu à a cità.

  • Percorsi patrimuniali

    A cità hà cunduttu, à pocu à pocu, campagne di ristoru di u patrimoniu immubiliare è mubigliare. Queste sò state appaghjate, ogni volta, à azzione di racolta è d’inventariu di l’elementi chì puntellanu u paisaghju urbanu è i percorsi turistichi.