Palazzu di i Guvernatori

L’edifiziu originale hè statu innalzatu da u guvernatore genuvese, Leonello Lomellini, in u 1380. Tandu, era solu una custruzzione furtificata chì hà datu u so nome à a cità « la Bastia ».

Palazzu di i Guvernatori / Palais des Gouverneurs - Allargà a fiura, .JPG 260Ko (fenêtre modale)
Palazzu di i Guvernatori / Palais des Gouverneurs© cità di bastia

I travagli da custruisce u casamentu ch’è no cunniscimu oghje, cù e so dimensione larghe, anu principiatu in u 1488 mentre ch’ellu era guvernatore Raffaello Grimaldi, sò compii in u 1521, quand’ellu era guvernatore Andrea Spinola. Indrentu à u Palazzu ci stava u guvernatore in i so appartamenti. Ci si truvava dinù e sale publiche per l’udienze, una corte di ghjustizia, i scagni o e cancellerie, trè cappelle (per u guvernatore, i suldati è i prigiuneri), e prigione di Statu, una caserna per i suldati alimani (a guardia persunale di u guvernatore).

Perde u Palazzu u so statutu di locu di residenza dopu a partenza di l’ultiimu guvernatore genuvese in u 1768. Ci si stabbilisce tandu u « Cunsigliu Supranu di l’Isula di Corsica ». Mentre a Revuluzione, ci avia a so sede u Direttoriu di u Dipartimentu. À parte si da u 1791, l’Armata ne face una caserna è ci stà finu à u 1948. Una bomba attempata abbatte un scornu di a corte interna in u 1943, hè ricustruitu in u 2008, in u stile mudernu.

U Palazzu di i Guvernatori hè statu classificatu cum’è Munumentu Storicu in u 1977, ci si trova dapoi u 1952 u Museu di Bastia.

Prupone stu Museu di Arte è di Storia , à quelli chì u volenu visità, di scopre e sale rinnuvate in u 2010, u so percorsu permanente chì si face segondu tematiche. Sò trè vie principale à astradà ne u discorsu : l’urbanisimu, u pesu puliticu, suciale è ecunomicu di a cità, a so ricchezza intellettuale è artistica.

 

Et aussi...

  • A Catedrale Santa Maria Assunta

    U decoru hè l’opera di i maestri stuccatori è di i pittori di u XVIIIu è di u XIXu seculu. Hè stata arricchita da i doni diviziosi di i veschi, di i curati è di i guvernatori chì anu datu pitture, statule, ogetti di orificeria. Per via di quessa, Santa Maria face un bellu spiccu in Bastia.

  • Piazza San Niculà

    Longa 280 metri è larga 80, u nome di a piazza San Niculà li vene da una chjesa è da un ospedale custruitu, mentre u Medievu, in issu locu. Questi sò stati spiantati in u 1889, da pudè allargà a piazza è allungà u corsu Paoli.

  • A Chjesa paruchjale San Ghjuvan’Battista

    Hè a chjesa più maiò di Corsica San Ghjuvan’Battista. Hè stata innalzata trà u 1636 è u 1666 induv’ella ci era, prima, una cappella.

  • Casamentu di i Nobili Dodeci

    Fù innalzatu in u 1703 duv’elle ci eranu nanzu e butteghe. U Casamentu di i Nobili Dodeci era a residenza di u raprisentante elettu di u « Di quà da monti » (u Cismonte oghjincu) chì cunsigliava u guvernatore genuvese.

  • A Porta Luigi XVI

    Era prima l’unicu accessu da pudè entre in a Citadella accinta ch’ella era da muraglioni, finch’ella fussi aperta a porta cù e turricelle, in u 1936, davanti à a catedrale. Sta porta maiò hè rifatta è imbellita in un stile necolassicu, mentre u regnu di Luigi XVI.

  • Oratoriu di a cunfraterna di a Santa Croce

    L’oratoriu di a cunfraterna di a Santa Croce, innalzatu in u 1543 nant’à un terrenu pussedutu da a basilica di San Ghjuvanni di u Lateranu chì hè a catedrale di u pontefice, hè dedicata à A Nunziata. In u 1600, si torna à custruisce l’edifiziu, da tandu ùn hè cambiatu per ciò chì tocca à e so dimensione.

  • Oratoriu di a cunfraterna di l’Immaculata Cuncezzione

    Hè stata fundata in u 1588 a cunfraterna di l’Immaculata Cuncezzione. L’edifiziu chì li ghjova di cappella hè statu compiu in u 1609. A so facciata l’adorna un purtone baroccu di u 1704, è hè ricuperta da lastre di marmaru di Carrara, poste in u 1858 è in u 1859.

  • Oratoriu di a cunfraterna di San Roccu

    Fù fundata in u 1588 a cunfraterna di San Roccu. Segondu a tradizione hè riservata à i giuvanotti di parochja di a cità bassa, omi fatti a devenu lascià da entre in un’altra cunfraterna.

  • Piazza Vincetti - Piazza d’Arme

    Prima sbuccava un ghjargalu in u Portu Vechju. Era l’anzianu portu di u paese di Belgodere, stabbilitu sopra à Bastia, sparitu oghje.