Date assignalate

Bastia : capitale storica, Cità d’arte è di storia

A storia di Bastia

Trae a so ricchezza Bastia da un passatu storicu chì li hà datu, longu i seculi, u so aspettu, a so geumetria, u so statutu.

A realità sbugiarda quelli chì dicenu ch’ella hè una « Cità Museu » Bastia, ùn si stà mancu appena ferma a cità. Si apre u so orizonte ver’di u Mediterraniu, per via di u so splindore hè diventata un crucivia culturale, turisticu è ecunomicu.

Fatta fine, ci tocca à ricunnosce ch’ella hà un carattere patrimuniale accertatu Bastia.

U so patrimoniu unicu è ricchissimu, chì si scontra di radu in Corsica, li hà permessu di ottene u labellu « Cità di Arte è di Storia » in u 1999.

 

E cronache anziane contanu ch’ella hè stata innalzata Bastia in un locu duve ci era prima una antica cità rumana chjamata Mantina (o Mantinum).

Quant’è in l’inseme di l’Auropa, a caduta di l’Imperu rumanu è l’invasione barbare chì anu spiantatu e cità di u liturale corsu, cagiuneghjanu cunfusione è dicadenza in a sucetà isulana. Quellu chì stavanu in l’anziani porti rumani, chì fiurianu prima, lascianu e piaghje (sottumesse à l’abbotti di pirati crudeli), da circà riparu in e machje zeppe à l’internu di e tarre è ver’di e muntagne.

U situ di Bastia hè guasi lasciatu à l’abbandonu, ci vole à aspettà a fine di u XIVu seculu per ch’ella sia urganizata una struttura urbana vera, tandu era Serenissima Republica à guvernà a Corsica.

 

À questa epica, ingiru à a cala di u Vechju Portu ch’è no cunniscimu oghje, sò poche e case di i piscadori è sò sott’à l’auturità di u paisolu medievale di Cardu inalpellatu nant’à un poghju. U portu di Cardu avia vantaghji strategichi postu chì u supranava un sciappale. Decidenu di furtificà lu i Genuvesi, innalzendu un turrione è muraglioni alti.

U turrione hè chjamatu « a bastia » postu ch’ellu s’assumiglia à una bastiglia, ci si stabilisce a so residenza u Guvernatore genuvese. U nome di a cità li vene da stu edifiziu. 

Da quandu ci si stabilisce u Guvernatore, Bastia diventa a capitale di l’isula. A cità nova hè cumposta di dui quartieri sfarenti : u Portu (chjamatu « Terravechja », postu ch’ellu hè u locu più anzianu di a cità) è a Citadella (chjamata « Terranova », custruita di novu). 

 

Mentre u XVIu è u XVIIu seculu,

hè rifinitu u sistema defensivu di a Citadella. À i rampali li sò aghjustati bastioni impunenti, quelli di San Carlu, San Ghjuvanni è Santa Maria. A vita in i quartieri di Terranova è di Terravechja si face industriosa, hè ritimata da e campane di i 26 edifizii religiosi chì si ponu truvà in cità. Bastia hè ancu una capitale religiosa : s’ellu si face u censu, ci hè una decina di cunventi maiò (4 per e donne è 6 per l’omi) in cità. Si spiega stu fattu chì, ogni ordine religiosu prisente inde l’isula hà vulsutu apre u so stabilimentu principale vicinu à u Guvernatore.

L’accertu, ùn ci hè un’altra cità in Corsica à pussede chjese, cunfraterne è cunventi quant’è Bastia. Sti edifizii barocchi custituiscenu una rete è strutturanu u tissutu urbanu, li danu un’identità propria. Spessu, e case bastiacce di l’epica barocca lascianu vede facciate alte di stile genuvese pocu adurnate.

 

À partesi da u 1768,

hè integrata a Corsica à u Regnu di Francia. Tandu, hè trasferitu u putere amministrativu da l’anzianu palazzu di i Guvernatori (in core di Terranova) ver’di Terravechja, inde u cunventu, spaziosu, di i Missiunarii Lazaristi (u Liceu Ghjuvanni Nicoli oghje). À guvernà l’isula, à nome di Luigi XV, hè u conte Louis Charles René de Marbeuf. À spese soie, face custruisce in u 1773 un teatru, vicinu à a chjesa San Ghjuvan’Battista, nant’à a piazza di u Mercà oghjinca. Hè u primu edifiziu custruitu inde l’isula di stu generu. A cumedia, a tragedia è l’opera garberanu, di manera particulare, à i Bastiacci. Una passione chì ùn hè ancu à stancià, dendu à a cità u statutu di capitale culturale di a Corsica chì ùn li si pò cuntrastà.

 

Mentre u regnu di Napulione,

Perde u so statutu di capitale amministrativa Bastia, à favore di Aiacciu, eppuru ùn hè affrenatu u so sviluppu.

 

Dopu a Resturazione, finu à u Secondu Imperu,

Bastia riesce una bellissima muta. A crescita demugraffica impone una urbanisazione nova è l’ecunumia chì fiurisce participeghja à dà li una dinamica. Si stende voltu u Nordu a cità è si allarga incù quartieri novi. Ciò ch’ella hè è ch’ella firmerà, Bastia, a scarpillineghja in a petra : primu portu è capitale ecunomica isulana. A piazza San Niculaiu hè assestata, sò aperte e vie maiò di cumunicazione, u corsu Pierangeli per indettu, u corsu Paoli è u carrughju César Campinchi. Ne sò u vantu di a cità, l’immobuli cù e so facciate neoclassiche chì inariceghjanu i corsi novi. À adurnà sti edifizii, ciò chì li dà u so garbu, sò i balconi cù balaustre, e curnice, i pilastri è i fruntoni. Daretu à e so porte massicce, spessu, i purtoni ascondenu gabbie di scale cù decori pinti da ingannà u sguardu, cù un versu talianu. E teghje di matticciu marinu di i tetti danu un culore singulare à u paisaghju urbanu.

 

Per via di un sforzu finanziariu tamantu, Bastia innalza un teatru novu, inauguratu in u 1879, dopu 5 anni di travagli. L’architettu sceltu da dutà a cità di un tempiu in l’onore di u belcanto era Andrea Scala, cuncepitore di u teatru di Pisa è di quellu di Catania. Segondu i spezialisti di storia urbana, l’assesti fatti à a medità di u 19u anu listessa impurtanza chè quelli fatti longu u seculu.

Hà disturbatu pocu l’unità di l’inseme architetturale bastiacciu u XXu seculu.

 

À partesi da l’anni 60,

 

Oghje, Bastia, cità di dimensione mudeste (circa 44 000 abitanti), hè u polu urbanu di una agglumerazione di 58 000 abitanti. Puru s’ella ùn hè più u capilocu amministrativu di a Corsica, ne ferma u centru ecunomicu, a capitale storica, culturale è patrimuniale.