Patrimoine / Patrimoniu

A Traversa

Mis en ligne le

Per sta decèsima crònica, Carlu Castellani è Ghjermana de Zerbi anu sceltu di parlà di A Traversa cun un sguardu nantu à dui stabbilimenti, unu sempre arrittu è l'altru chì hè sparitu.

Dui stabilimenti nantu à a Traversa

Sempre chjamatu A Traversa da i Bastiacci, u corsu Paoli, ex Rue de la Traverse, chì ne fù decisa a custruzzione in u 1831, hè a via principale di a cità. Orientatu da meziornu à tramuntana, si stende da u giratoghju di u Palazzu di Ghjustizia sinu à u corsu Sebastiani, turcendu à un quartu di u percorsu, à livellu di u bellissimu purtò in màrmaru di u nùmaru 12.

A parte cumpresa trà sta vultata è u nordu (vale à dì a parte inghjò), fù chjamata corsu Paoli è a parte da a vultata versu insù, sinu à u Giratoghju, a chjamonu boulevard du Palais.

In u 1941, st'ultimu pezzu fù chjamatu corsu Generale Bonaparte, eppo in u 1943, a via sana pigliete u nome d'oghje, boulevard Paoli.

Da ritene : in fondu di A Traversa, à manu dritta falendu, l'ultimi trè casali ùn anu micca purtò da stu latu è a so entrata si trova ver di Piazza Santu Niculà o in e duie strette - senza nome - chì leganu A Traversa à u corsu de Gaulle.

À i nùmari 37 è 37 bis s'innalzava u palazzu Valery.

Vultemu un pocu in dietru : u primu scagnu di A Posta - in u 1795 - era stallatu in un'ala di u Cunventu di i Missiunarii, chjamatu U Guvernamentu dopu ch'ellu fussi a sede di u guvernu francese in Corsica, da u 1769. Oghje hè u liceu Jean-Nicoli.

Dopu, A Posta andò Stretta Galeazzini, à u Mercatu, attuale carrughju Posta Vechja.

Ver di u 1823, si n'andete in Casa Podestà, 26, carrughju di i Ghjesuitti chjamatu dopu carrughju di u Liceu è avà carrughju Generale Carbuccia.

A Posta fù dinù albergata un tempu à u 4 di u carrughju Salvatore Viale.

È infine, gira chì mi ti gira, in u 1910 a direzzione di A Posta appigiuneghja u pian di terra di u Palazzu Valery è i servizii ci steranu finu à ch'ellu sia distruttu u palazzu in u 1962.

Era situatu u Palazzu Valery induv'ella si trova oghje a residenza Paoli. Fù custruitu da u conte Ghjiseppu Valery, annubbilitu da u papa Piu IX. Cofundatore di a Cumpagnia Valery, a più impurtante di u Mediterraniu cù una flotta di trenta battelli chì cullèganu Marseglia à a Corsica è à l'Algeria, presidente di a Càmera di cummerciu di Bastia (1859-1877), cunsiglieru generale bunapartistu di Brandu è senatore di a Corsica (1876-79).

U conte Valery, natu in Erbalonga in u 1826, more u 26 di marzu di u 1879 in Italia, vicinu à Fiurenza.

U cullegiu Simon Vinciguerra

I ghjesuitti ghjunghjenu in Bastia in u 1552 è, per custruicci u so cunventu, còmpranu in u 1601 u cusidettu Giardinu di u Guvernadore. U stabbilimentu, erettu in u 1612 - a cappella serà compia in u 1635 - alberga oghje u cullegiu Simon-Vinciguerra.

Simonghjuvanni Vinciguerra (1903-1971), fù prufessore di storia è geugraffia à u liceu di Bastia da u 1934 à u 1964. Natu à A Petra di Verde, militante cummunistu, resistente, pueta è scrittore in lingua corsa cù u pseudònimu di Ghjuvan di a Grotta, hà scrittu un'òpera teatrale è puètica impurtante à tempu ch'ellu facìa ricerche è artìculi à caràtteru etnulògicu nantu à a Corsica.

Sottu à u Primu imperu, in u cunventu di i ghjesuitti s'assestonu l'appartamenti attribbuiti à u senatore di a Corsica, u conte Raffaellu de Casabianca.

In l'anni 1820, u bastimentu fù destinatu à l'insignamentu segundariu è uspitò dinù a merria, a bibliuteca municipale, u scagnu di pulizza è a corte d'appellu di a Corsica.

In u 1843, pigliete u nome di Collège Royal è in u 1848 diventò un liceu. Tandu hè chjamatu Lycée Impérial poi Lycée de Bastia poi Lycée Pétain.

In u 1946 l'internatu - chì era solu pè i maschji - hè trasferitu à a Caserna Marbeuf (ex Cunventu di i Missiunarii), oghje Liceu Jean-Nicoli.

(Parechji elementi di st'artìculu anu per fonte L'Almanaccu di Bastia. Cumitatu di E feste è di u patrimoniu. 2005).

Carlu Castellani è Ghjermana de Zerbi