A Catedrale Santa Maria Assunta

U decoru hè l’opera di i maestri stuccatori è di i pittori di u XVIIIu è di u XIXu seculu. Hè stata arricchita da i doni diviziosi di i veschi, di i curati è di i guvernatori chì anu datu pitture, statule, ogetti di orificeria. Per via di quessa, Santa Maria face un bellu spiccu in Bastia.

Catedrale Santa Maria

Ristoru in u 1936

Cathédrale Sainte Marie de l'Assomption - Allargà a fiura, .JPG 1.2Mo (fenêtre modale)
Cathédrale Sainte Marie de l'Assomption© cità di bastia
Cathédrale Sainte Marie de l'Assomption - Allargà a fiura, .JPG 839Ko (fenêtre modale)
Cathédrale Sainte Marie de l'Assomption© cità di bastia
Cathédrale Sainte Marie de l'Assomption - Allargà a fiura, .JPG 514Ko (fenêtre modale)
Cathédrale Sainte Marie de l'Assomption© cità di bastia
Cathédrale Sainte Marie de l'AssomptionCoupe longitudinale de la cathédrale dessin de la fin XIXe s. (Archives Paroissiales) - Allargà a fiura, .JPG 395Ko (fenêtre modale)
Cathédrale Sainte Marie de l'Assomption
Coupe longitudinale de la cathédrale dessin de la fin XIXe s.
© (Archives Paroissiales) - cità di bastia

Mentre u XVIu seculu, i veschi di Mariana mantenianu a chjesa à spese soie. In u 1570, Munsignore Centurione, nobile genuvese, ottense l’accunsentu di u Papa Piu V, per ch’ellu si pudessi stabbilisce in Bastia.

In u 1590, per via di l’interventu di Munsignore Lisandru Sauli, vescu di Aleria, a chjesa Santa Maria diventa una catedrale. Da tandu, i veschi chì s’anu da succede ùn smetteranu di circà danari, da ch’ella sia a chjesa in accordu cù a so funzione nova. Avia lasciatu in u 1467, Munsignore Fornari, 1 000 scudi è più in banca di San Ghjorghju, da ch’elli pudessinu ghjuvà per u ristoru di l’antica catedrale di a Canonica, innalzata in a piaghja diserta di a Marana, duve ci curria a malaria. In u 1600, hè attribuita sta somma per a custruzzione di a catedrale nova. Munsignore Girolamo del Pozzo ne face stabbilisce i piani subbitu subbitu è ne pone a prima petra in u 1604.

I travagli di custruzzione sò cundutti da Cristoforo Marengo, nativu di Savoia è arrughjunatu si in Bastia. Parechji membri di a so famiglia participeranu à u cantieru di a catedrale.

 

Sò compii in u 1619 i travagli à l’internu di Santa Maria, hè ultimatu u campanile in u 1620. Munsignore Giulio del Pozzo, nipote di u vescu precedente, cunsacra a catedrale u 17 di lugliu di u 1625. I travagli per a facciata, opera di maestri genuvesi, veneranu eseguiti dopu è saranu compii in u 1670.

Hè un edifiziu maestosu, a catedrale Santa Maria, « cù trè vascelli di cinque travate.

A volta centrale hè in arcu tondu. I vascelli laterali, elli, sò fatti à volta à crucera. Tuttu posa à nant’à arcate di pilastri. Hà a forma di un mezu chjerchju u pianu di u coru, i dui capizzali laterali sò piani. » (L’architettura religiosa barocca in Corsica - Jean-Marc  Olivesi).

Segondu a spressione di Munsignore Rodié, vescu di Corsica, quella « bellissima nave » hè longa 44, 75 metri, larga 23, 53 metri è alta 17, 20 metri.

 

À l’incuntrariu di u cleru corsu è soprattuttu di i veschi chì mettenu in opera e decisione di u Cunciliu di Trentu, per ciò chì tocca anzituttu à l’architettura (navata unica, imprimurà si di a visibbilità è di l’acustica), u pianu sceltu da u vescu di Mariana ripigliava quellu di l’anziana catedrale pisana di a Canonica.

Si ne pò capisce faciule faciule e ragioni : ci hè prima l’affettu per l’antica catedrale chì ne tenenu i veschi u so nome in a so titulatura. È po l’impurtanza ch’ella pò avè una navata à trè vascelli per e cerimonie, frà e quale e prucessione è u passaghju di i puteri di i guvernatori. L’ultimu aspettu hè chì una chjesa simile pudia accoglie fideli assai.

Hè accaduta dinù ch’ellu ricusessi qualchì prelatu di trasfurmà un edifiziu da ùn sgumentà a pupulazione, o solu per via chì ùn si ne avia gustu. Hè cusì chì u papa Innocenzo X hà impeditu à Borromini di tuccà e volte di San Ghjuvanni di u Lateranu.

  • A facciata di a catedrale Santa Maria pussede dui nivelli supranati da trè fruntoni chì permettenu di spiccà a navata centrale da quelle laterale.
  • Si ponu distingue i fruntoni laterali, anu sottu edicule cù nichje duve sò poste e statule di San Petru è di San Paulu.
  • Una finestra murata, pussedendu trè arcate, adurneghja a parte centrale di u secondu nivellu. Trè porte, à pian di terra, permettenu à numerosi fideli di pudè entre.

Ristoru di u 1998

A facciata ramenta quelle di San Stefano di Lavagna è di Sant’Erasmo di Voltri in Liguria, opere di l’architettu Ghiso.

Indrentu, l’altari di marmaru pulicromu venenu da l’attelli famosi di Genuva, quellu di Tomaso Casella à u XVIIu seculu, per indettu.

U decoru hè l’opera di i maestri stuccatori è di i pittori di u XVIIIu è di u XIXu seculu. Hè stata arricchita da i doni diviziosi di i veschi, di i curati è di i guvernatori chì anu datu pitture, statule, ogetti di orificeria. Per via di quessa, Santa Maria face un bellu spiccu in Bastia.

 

Et aussi...

  • Piazza San Niculà

    Longa 280 metri è larga 80, u nome di a piazza San Niculà li vene da una chjesa è da un ospedale custruitu, mentre u Medievu, in issu locu. Questi sò stati spiantati in u 1889, da pudè allargà a piazza è allungà u corsu Paoli.

  • Palazzu di i Guvernatori

    L’edifiziu originale hè statu innalzatu da u guvernatore genuvese, Leonello Lomellini, in u 1380. Tandu, era solu una custruzzione furtificata chì hà datu u so nome à a cità « la Bastia ».

  • A Chjesa paruchjale San Ghjuvan’Battista

    Hè a chjesa più maiò di Corsica San Ghjuvan’Battista. Hè stata innalzata trà u 1636 è u 1666 induv’ella ci era, prima, una cappella.

  • Casamentu di i Nobili Dodeci

    Fù innalzatu in u 1703 duv’elle ci eranu nanzu e butteghe. U Casamentu di i Nobili Dodeci era a residenza di u raprisentante elettu di u « Di quà da monti » (u Cismonte oghjincu) chì cunsigliava u guvernatore genuvese.

  • A Porta Luigi XVI

    Era prima l’unicu accessu da pudè entre in a Citadella accinta ch’ella era da muraglioni, finch’ella fussi aperta a porta cù e turricelle, in u 1936, davanti à a catedrale. Sta porta maiò hè rifatta è imbellita in un stile necolassicu, mentre u regnu di Luigi XVI.

  • Oratoriu di a cunfraterna di a Santa Croce

    L’oratoriu di a cunfraterna di a Santa Croce, innalzatu in u 1543 nant’à un terrenu pussedutu da a basilica di San Ghjuvanni di u Lateranu chì hè a catedrale di u pontefice, hè dedicata à A Nunziata. In u 1600, si torna à custruisce l’edifiziu, da tandu ùn hè cambiatu per ciò chì tocca à e so dimensione.

  • Oratoriu di a cunfraterna di l’Immaculata Cuncezzione

    Hè stata fundata in u 1588 a cunfraterna di l’Immaculata Cuncezzione. L’edifiziu chì li ghjova di cappella hè statu compiu in u 1609. A so facciata l’adorna un purtone baroccu di u 1704, è hè ricuperta da lastre di marmaru di Carrara, poste in u 1858 è in u 1859.

  • Oratoriu di a cunfraterna di San Roccu

    Fù fundata in u 1588 a cunfraterna di San Roccu. Segondu a tradizione hè riservata à i giuvanotti di parochja di a cità bassa, omi fatti a devenu lascià da entre in un’altra cunfraterna.

  • Piazza Vincetti - Piazza d’Arme

    Prima sbuccava un ghjargalu in u Portu Vechju. Era l’anzianu portu di u paese di Belgodere, stabbilitu sopra à Bastia, sparitu oghje.