Oratoriu di a cunfraterna di a Santa Croce

L’oratoriu di a cunfraterna di a Santa Croce, innalzatu in u 1543 nant’à un terrenu pussedutu da a basilica di San Ghjuvanni di u Lateranu chì hè a catedrale di u pontefice, hè dedicata à A Nunziata. In u 1600, si torna à custruisce l’edifiziu, da tandu ùn hè cambiatu per ciò chì tocca à e so dimensione.

Oratoire de la Confrérie de Sainte Croix - Allargà a fiura, .JPG 519Ko (fenêtre modale)
Oratoire de la Confrérie de Sainte Croix© cità di bastia

A cappella di u Santissimu Crucifissu di i Miraculi

Hè ascosa, indrentu, a cappella di u Santissimu Crucifissu di i Miraculi, o Cristu negru, ch’elli scuprinu dui piscadori per mare, segondu a legenda, in u 1428. Mentre u XVIIIu seculu, ci hè vulsutu guasi à rifà l’inseme di i ricchissimi decori originali (nant’à i muri è e volte), chì i bumbardamenti di i battelli inglesi avianu dannighjatu l’edifiziu in u 1745.

Sò artisti di ceppu ligure è corsu à avè realizatu i decori di stuccu innuratu, trà u 1758 è u 1775. L’estetica pumposa di questi adurnamenti ammenta u barocchetto genuvese è u stile francese dettu « Rocaille ». U retrutavula di l’altare maiò, opera di u pittore fiurentinu Giovanni Bilivert di u 1633, raprisenta a Nunziata. Hè spostu, in una vitrina, un gruppu prucessiunale di legnu pulicromu, ch’ellu sculpì Luigi Grisciella, in u 1804-1805.

Scrisse Prosper Mérimée, dopu à avè visitatu Santa Croce in u 1839, ch’ella avia : "un certain caractère de grandeur, comme tout ce qui paraît riche et coûteux".

Hè a più anziana cunfraterna di Bastia, quella di Santa Croce. Amministrava l’uspiziu genuvese San Niculaiu. Hè stata classificata a chjesa in u 1931 cum’è Munumentu Storicu.

 

Passà a carta

Et aussi...

  • A Catedrale Santa Maria Assunta

    U decoru hè l’opera di i maestri stuccatori è di i pittori di u XVIIIu è di u XIXu seculu. Hè stata arricchita da i doni diviziosi di i veschi, di i curati è di i guvernatori chì anu datu pitture, statule, ogetti di orificeria. Per via di quessa, Santa Maria face un bellu spiccu in Bastia.

  • Palazzu di i Guvernatori

    L’edifiziu originale hè statu innalzatu da u guvernatore genuvese, Leonello Lomellini, in u 1380. Tandu, era solu una custruzzione furtificata chì hà datu u so nome à a cità « la Bastia ».

  • A Chjesa paruchjale San Ghjuvan’Battista

    Hè a chjesa più maiò di Corsica San Ghjuvan’Battista. Hè stata innalzata trà u 1636 è u 1666 induv’ella ci era, prima, una cappella.

  • Casamentu di i Nobili Dodeci

    Fù innalzatu in u 1703 duv’elle ci eranu nanzu e butteghe. U Casamentu di i Nobili Dodeci era a residenza di u raprisentante elettu di u « Di quà da monti » (u Cismonte oghjincu) chì cunsigliava u guvernatore genuvese.

  • A Porta Luigi XVI

    Era prima l’unicu accessu da pudè entre in a Citadella accinta ch’ella era da muraglioni, finch’ella fussi aperta a porta cù e turricelle, in u 1936, davanti à a catedrale. Sta porta maiò hè rifatta è imbellita in un stile necolassicu, mentre u regnu di Luigi XVI.

  • Piazza San Niculà

    Longa 280 metri è larga 80, u nome di a piazza San Niculà li vene da una chjesa è da un ospedale custruitu, mentre u Medievu, in issu locu. Questi sò stati spiantati in u 1889, da pudè allargà a piazza è allungà u corsu Paoli.

  • Oratoriu di a cunfraterna di l’Immaculata Cuncezzione

    Hè stata fundata in u 1588 a cunfraterna di l’Immaculata Cuncezzione. L’edifiziu chì li ghjova di cappella hè statu compiu in u 1609. A so facciata l’adorna un purtone baroccu di u 1704, è hè ricuperta da lastre di marmaru di Carrara, poste in u 1858 è in u 1859.

  • Oratoriu di a cunfraterna di San Roccu

    Fù fundata in u 1588 a cunfraterna di San Roccu. Segondu a tradizione hè riservata à i giuvanotti di parochja di a cità bassa, omi fatti a devenu lascià da entre in un’altra cunfraterna.

  • Piazza Vincetti - Piazza d’Arme

    Prima sbuccava un ghjargalu in u Portu Vechju. Era l’anzianu portu di u paese di Belgodere, stabbilitu sopra à Bastia, sparitu oghje.