Bastia in Festa, da l'8 à u 16 d'agostu

Mis en ligne le

, .PNG 1.1Mo ()

Troppu affari almanaccati per Bastia In Festa, l’annunziemu pocu à pocu pè esse sicuri di ùn mancà nunda. Settimana da l’ottu à u sedeci d’agostu di u 2016

Salute à tutti ! Spergu chì vi site campi cun Bastia In Festa, è ch’è vo avete a brama di scopre ciò chì vi serà prupostu ssi pochi ghjorni. Ùn vi facciu più aspettà, infurchemu !

Luni l’8 d’agostu

Nunda, nunda, u luni si strazia ùn si mette nunda in ballu è mi dispiace ! Infine, ci hè quantunque a mostra « Corsica Genuvese », spampillulente chì basta, à truvà ci à u Museu. Eccu, teh, vai ci puru chì male ùn ti ferà !

Marti u 9 d’agostu

Cum’è di sòlitu trà aprile è ottobre, ogni marti hè dedicatu à e « Légendines », à partesi da quattre ore è mezu, partenza da l'Uffìziu di u Turìsimu (in fondu di a piazza Santu Niculà). U scopu hè di fà scopre a Bastia altrimente, ch'omu ci sia in vacanze o puru nativu chì troppu à spessu ùn si cunnosce abbastanza a so pròpia cità ! Per sapè ne di più, chjama puru à u 04.95.54.20.40 !

Marti sera ci serà u « Cuncertu Crucivìa di u Mediterraniu » (Concert Carrefour de la Méditerranée). Si tenerà inde a corte di u Museu, in Citatella dunque (per quelli in fondu ch'ùn stanu attenti), principia à 9 ore da sera, sempre in leia cù a mostra « Corsica Genuvese » (iè, quella ch’è tù ai vistu eri nant'à u mo cunsìgliu). Da sente dunque l’arpista Claire Galo Place è a flautista Ginevra Petrucci !

Mercuri u 10 d’agostu

Mercuri invece di allumacà ti puderai andà à dà lu to sangue, t’aspetteranu elli trà meziornu è cinque ore di sera in Piazza San Niculà, ùn si sà mai chì pò ancu salvà a vita à qualchissìa ! 

Dopu, ti prupongu u Mercatu di Notte d'Estate, (sin'à a fine d'aostu si tenerà da u mercuri à a dumenica), sò criatori (donne è omi) chì danu à vede i so banchi nant'à a Calata, da ottu ore di sera sin’à mezanotte.

Ghjovi l’11 d’agostu

Cum’è ogni ghjovi, ci serà Milonga di Notte, chì à mumenti ti l'averaghju spiegata 8 volte, ghjè una stonda di tango nant'à u sacratu di a Chjesa San Roccu, stonda bella, calda, festosa, di ballu (in veru), aiò affacati chì ci campemu ! Da ottu ore di sera à ondeci ore è mezu, t'aspettemu.

Venneri u 12 d’agostu

Ci simu, ci simu. L'ùltimu. Dopu hè bella finita. L'ùltimu « Shopping di Notte » di a stagione, serà vènneri questu. Iè, a sò, anch'eiu avìa pigliatu suchju à ssi gruppi più o menu strani chì svucialavanu in carrughju. Oups ! Scusa, chi ci facenu onore cù i so canti scelti. Tandu, serà l'ùltima volta di l'estatina per entre ind'una buttega à dece ore di sera senza chì qualchissìa chjamessi a pulizza, sai ciò chì ti ferma à fà…

Sabbatu u 13 d’agostu

Nunda di speziale, ma e scàtule à libri ci sò sempre, dunque à parè meiu, ti puderai gode di qualchì tempu di sciali indè i Giardini di u Fangu oppuru à a Rinella (iè, a sò, certi anu à Paris Plage, a campa !) cansà si una cria è slibraccià, à libru scioltu, viderai chì custì puderai infattà à Nietzche quant'è u Club des 5 !

Dumenica u 14 d’agostu

Sunata hè l’ora di l'apperitivu in musica ! Cum’è ogni dumenica matina d'estate, un gruppu vi serà prupostu indè u chjoscu di a Piazza San Niculà, è sta settimana tocca à Bastia Blue Band. Sò digià passati, duie settimane fà, è ci sò stati « like » quant’è mai nant'à Facebook, tandu deve esse bè davveru, nò ? Megliu feresti à fà ti un’affaccatella !

Luni u 15 d’agostu

Ne parlemu oghje chì marti prossimu serà troppu tardi, luni hè Santa Maria. Vale à dì Messa sulenne à a Catedrale (Santa Maria, iè. #Cuerenza) à parte da 10ore è mezu di matina, chì serà seguitatu da un focu d’artifiziu à parte da 10ore è quaranta di sera.

Serà tiratu da u molu, cum’è di solitu in Bastia.

Marti u 16 d’agostu

Festa tradiziunale torna, si festighjeghja quì à San Roccu ! À l’occasione ci serà una messa à 8ore è mezu di matina, una messa à 10ore è mezu, una cunferenza à 4ore è infine una prucessione à parte da 5ore è mezu di sera ! U tuttu si ferà nant’à u sacratu di a chjesa San Roccu è allestitu da a cunfraterna eponima.

À prestu !