Patrimoine / Patrimoniu

San Roccu

Mis en ligne le

, .JPG 202Ko ()

[Tradizione]

A grande pesta ch’hà toccu Bastia in lu 1569 avìa fattu centinaie di morti. Si dice ch’ella si firmò per via di l’intercessione miraculosa d’un santu. Secondu un’antica tradizione, ghjè à San Roccu ch’elli s’addirizzonu i Bastiacci per dumandalli di fà piantà l’epidemìa. Messe, prucessiò è un votu : quellu di fà custruì un oratoriu dedicatu à u santu prutettore, in lu Carrughju Napuleò oghjincu. Tuttu fù messu in òpera. D’una manera ch’ùn si pò spiegà, a pesta s’arrestò à e cunfine di Terra Vechja è di Terra Nova. Una lastra zuccata in la petra di Lavagna, chì ripresenta à San Roccu cù a Madonna, posta nant’à a facciata nordu di a Casa Castagnola, à E Terrazze, ci ramenta issu fattu. I Bastiacci fecenu edificà l’oratoriu in lu 1589, pè ringrazià à San Roccu chì l’avìa parati d’issa malatìa. St’oratoriu diventerà a sede di a Cunfraterna San Roccu, fundata in lu 1588 da Munsignore Nicolò Mascardi. San Roccu hè festighjatu u 16 d’agostu. Issu ghjornu, dopu à l’offizii, sò distribuìti i famosi panucci benedetti.

(Fonte : Almanaccu di Bastia)